ЦХИНВАЛ, 25 май — Sputnik. Ӕппæтуæрæсейаг турнир хоккейæ "Аланийы кубок" фыццаг хатт ацæудзæн Цæгат Ирыстоны, фехъусын кодтой Sputnik Дзæуджыхъæуы фæсивæдон спортивон скъолайы пресс-службæйы.
"Хуыздæр командæйы ном хæссыныл стох кæндзысты хоккейон клубтæ Ростов-на-Дону, Краснодар æмæ Белгороды областæй. Хайадисджытæ иууылдæр хауынц кæстæр кары къордмæ (2008 азы гуырд)", — загътой пресс-службæйы.
Турниры æрбайгомы церемонийы райсдзысты хайад РЦИ-Аланийы спорты министр Бæройты Хасан æмæ Цæгат Ирыстоны эстрадон коллективтæ.
Спортивон мадзалы организатортæ сты Дзæуджыхъæуы спорты зымæгон хуызты сывæллæтты спортивон скъола æмæ ХК "Алания-2008" ныййарджыты комитет РЦИ-Аланийы спорт æмæ физикон культурæйы министрады æххуысæй.
Турниры спонсортæ сты компаниты къорд "Бавария", уазæгдон "Владикавказ", "Ростелеком"-ы цæгатирыстойнаг филиал, Адджинæгты хæдзар "Анечка", рекламон агентад "Абрикос", базарадон базæ "Чиба", РЦИ-Аланийы парламенты депутат Пъæгиты Вячеслав æмæ "Автоколонна 1210"-ы директор.
