ЦХИНВАЛ, 7 июн — Sputnik. Хуссар Ирыстоны президент Бибылты Анатолий снысан кодта республикæйы паддзахадон хъахъхъӕнынады хистӕрӕй Бибылты Ацӕмӕзы, хъусын кæны паддзахады сæргълæууæджы пресс-службæ.
Службӕйӕн раздӕр разамынад лӕвӕрдта Гуычмӕзты Мурӕт.
Абон ма президент бафыста къорд барамынды. Хъӕууон хъӕдзарады министрӕй нысан ӕрцыд Пухаты Лев, ӕвӕниздзинад хъахъхъӕнынады министрӕй — Тотчиты Георгий, Мидхъуыддӕгты министрады сӕргъ слӕууыд Наниты Игорь. Фидар ма рцыд Цхинвалы ног мэр дӕр — Коцты Алан.
Уымӕй дарддӕр ма 25 майы Бибылты Анатолий сарæзта цалдæр кадрон ивындзынады. Медойты Дмитрий ссис фæсарæйнаг хъуыддæгты министр, Хæбæлаты Аза — финансты министр, Гасситы Натали — ахуырады министр, Лалыты Зæлинæ — юстицийы министр, Зассеты Жанна — культурæйы министр.Тадтаты Аланы снысан кодтой УУМ-ы сæргълæууæгæй, Хуссар Ирыстоны экономикон райрæзты министр ссис Кокойты Геннадий.
Хуссар Ирыстоны хицауад отставкӕйы ацыд 24 апрелы, Бибылты Анатолий президенты бынатмæ куы бахызт, уæд. Министрты ног кабинеты сфидармӕ уагдӕтты къухдариуӕггӕнджытӕ рӕстӕгмӕ ӕххӕст кодтой сӕ хӕстӕ.
