ЦХИНВАЛ, 14 июн — Sputnik. Цæгат Кавказы улæфæндæттæм балцæгтæ аргъцухæй æнхъарынц профцæдистæ Хуссар Ирыстоны цӕрджытӕн, фехъусын кодта Sputnik РХИ Профцӕдисты советы сӕрдар Джергаты Жанна.
Санаторитæ æрбакæндзысты ацы мæйы кæрон. Баулæфыны фадат ис Урсдон, Тамиск, Железноводск, Кисловодск, Кавминвод, Ессентуки æмæ æндæр цæгаткавказаг санаториты.
"Уæрæсейы профцæдистимæ бадзырды фæрцы цæгаткавказаг улæфæндæттæм балцæгтæ уæй цæуынц 20% аргъцухæй, профцæдисты уæнгтæн сæ улæфт слæууы ноджы 20% цухдæр. 12 боны улæфт лæууы 17-22 мин сомы", — радзырдта Джергаты Жанна.
Йӕ ныхӕстӕм гӕсгӕ, улæфджыты æвзаргæ нæ кæнынц, алкæмæн дæр йæ бон у балхæнын балцæг, "ныридæгæн дæр чидӕртӕ сæхи фыссынц "Урсдонмæ".
Профцӕдисты сӕрдар ма банысан кодта, ивгъуыд азы фадат кӕй уыд балхæнын балцæгтæ Сау денджызы былгæрон улæфæндæттæм, фæлæ популярон кæй нæ разындысты, уымæ гæсгæ сæ ацы аз нал райстой.
