ЦХИНВАЛ, 27 июн — Sputnik, Козаты Диана. Цæгатирыстойнаг абитуриенттæй Уæрæсейы МХМ-ы уæлдæр ахуырадон уагдæтты йæ ахуыр кæй фæнды адарддæр кæнын, уыдонæн райдыдтой бацæуæн фæлварæнтæ, загътой Sputnik Хуссар Ирыстоны МХМ-ы пресс-службæйы.
УФ МХМ-ы уæлдæр ахуырадон уагдæттæм бацæуынæн кандидаттæ хъуамæ радтой фæлварæнтæ уырыссаг æвзаг æмæ историйæ, рацæуой медицинон æмæ психологон басгæрст, афтæ ма райсой физикон цæттæдзинадæн аргълæвæрд.
"Абитуриенттæ ныридæгæн рацыдысты фыццаг фæлварæн. Уырыссаг æвзагæй диктант ныффыстой 32 кандидаты", — загътой ведомствæйы пресс-службæйы.
Ӕвзæрст кæцы абитуриенттæ æрцæуой, уыдон суыдзысты Краснодары университеты, Волгоградаг академийы, Ростоваг юридикон институты, Уæрæсейы МХМ-ы Воронежаг институты студенттæ ахæм дæсниадæй — "националон æдасдзинады барадон ифтонгад".
"Уæрæсейы МХМ-ы ахуырадон уагдæттæ ацы аз Хуссар Ирыстонæн рахицæн кодтой 20 бынаты. Курсанттæ уыдзысты æххæст паддзахадон ифтонгадыл. Уыдонæн лæвæрд цæуы сæрмагонд ном "милицийы лейтенант". Ахуырадон уагдоны ахуыры æзтæ ма хаст æрцæуыдзысты кусæгон стажмæ", — банысан кодта пресс-службæйы кусæг.
Ахуыр каст фæуыны фæстæ, бафысгæ контракттæм гæсгæ, курсанттæ хъуамæ æрæздæхой фæстæмæ æмæ бацæуой кусынмæ Хуссар Ирыстоны мидхъуыддæгты органтæм.
