ЦХИНВАЛ, 27 июн — Sputnik. Зынгæ ирон ахуыргонд Джусойты Нафийы зиан æвæрыны бон — 2017 азы 29 июнь — расидт æрцыд фыдохы бонæй, дзырдæуы республикæйы президенты официалон сайтыл.
Республикæ Хуссар Ирыстоны фыдохы бон расидыны фæдыл, президенты бардзырмæ гæсгæ, республикæйы территорийыл æркъул кæндзысты тырысатæ æмæ аивдзысты хиирхæфсæн мадзæлттæ æмæ алæвæрдтæ.
Нафийы марды чырын æвæрд уыдзæн зиан æвæрыны бон —29 июны — парламенты залы, кæй фæнда зонады ирд архайæджы йæ фæстаг фæндагыл афæндараст кæнын, уыдонæй алкæмæн дæр уыдзæн æрбацæуыны æмæ йын фæстаг хæрзбон зæгъыны фадат.
Зынгæ ирон ахуыргонд Джусойты Нафи йæ цардæй ахицæн 25 июны Дзæуджыхъæуы 92 азы кары. Ахуыргонды зиан бавæрдзысты Хуссар Ирыстоны.
