ЦХИНВАЛ, 12 июл — Sputnik. Цæгатирыстойнаг паддзахадон академион кафты ансамбль "Алан" ратдзæн концерт Мæскуыйы иууыл нырыккондæр концертон фæзуат — "Крокус Сити Холл"-ы сценæйыл, хъусын кæны Федералон æмбырды уæвæг Цæгат Ирыстоны минæвæртты сайт.
Ансамбль "Алан", Адæмты хæлардзинады ордены хицау, æрцæудзæн 22 сентябры Уæрæсейы столицæмæ уæрæх концертон программæимæ — "Кавказы адæмты кафтытæ". Йе сконды бацыдысты куыд фæстаг æзты хуыздæр куыстытæ, афтæ ансамблы бындурон номыртæ — уæздан "Симд", лирикон "Хонгæ кафт", азартон" Хъаматимæ кафт" æмæ юмористон "Фыййæутты кафт".
"Алан" у Цæгат Ирыстоны рагондæр кафты коллективтæй иу. Ансамблы сконды сты Уæрæсейы Федерацийы аивады сгуыхт архайджытæ, республикæ Цæгат Ирыстоны адæмон æмæ сгуыхтартисттæ. Коллективы артисттæ сæ арæхстдзинад равдыстой Германи, Бельги, Франц, Стыр Британи, Дани, Нидерландты, Китай, Афганистан, Иордани æмæ æндæр бæстæты концертон фæзуæттыл.
