ЦХИНВАЛ, 26 июл — Sputnik. Ирон богал Челдыты Давид рамбылдта Европæйы юниораг чемпионаты сыгъзæрин, хъусын кæны Ossetia News.
Уый ссис иууыл арæхстджындæр спортсмен 69 кг онг уæзы категорийы. Уый размæ Ирыстоны минæвары къухты Уæрæсейы æмбырдгонды сконды бафтыд æртæ уæлахизы.
Уæлахизмæ фæндагыл уый разынд тыхджындæр Белорусси, Турк æмæ Азербайджанæй спортсментæй.
"Финалы Челдыты Давиды ныхмæлæууæг уыд Василий Дьякон Молдавийæ. Тохы фыццаг хай нæ спортсмен ауагъта ныфсджынæй — 4:0. Дыккаджы кæд уый йæхи равдыста лæмæгъдæрæй, уæддæр уæлæмхас бæрæггæнæнтæм гæсгæ уæлахиздзау ссис Давид", — дзырдæуы хъусинаджы.
Финалмæ ма ахызт Ирыстоны ноджы иу минæвар — Хостыхъоты Арсæмæг. Уый басаста йæ ныхмæлæуджыты иууылдæр — æртæ ныхмæлæуд дæр фесты æмгъуыдæй раздæр.
Хостыхъоты Арсæмæджы хайадистæй финал ацæудзæн 26 июлы, йæ ныхмæлæууæг уыдзæн азербайджанаг спортсмен Абдулмуслим Мамедов.
