ЦХИНВАЛ, 26 июл — Sputnik. Хуссар Ирыстоны арæныл Гуырдзыстонимæ ацы азы фыццаг æмбисы ахст æрцыд 109 арæнсæттæджы, уый нымæцы иу турист Чехийæ, фехъусын кодтой республикæйы паддзахадон æдасдзинады пресс-службæйы.
Ведомствæйы информацимæ гæсгæ, æдæппæт ацы æмгъуыды мидæг арæнсæтджытæ банысан кодтой 181 фæткхæлды, уыдонæй 109 баст уыдысты паддзахадон арæны æмæ 72 та арæнгæрон режимы фехæлдимæ.
Комитеты куыд банысан кодтой, афтæмæй "Евроцæдисæй Гуырдзыстонмæ цæуæг туристтæм гуырдзыстойнаг хицауадæн æбæрнон ахаст кæй ис, уый тыххæй арæнсæтджыты нымæцы разынд Чехийы æмбæстаг дæр".
Уымæй дарддæр ма, январы æмæ июны нысан æрцыдысты арæн фехалыны цаутæ, кæцытæ баст уыдысты, Гуырдзыстоны æмбæстæгтæ хуыздæр цардагур кæй цыдысты, афтæ ма сæ Хуссар Ирыстоны политикон æмбæхсæндон кæй фæндыд райсын, уыимæ. Фæткхæлдты фылдæр хайæн уыд хæдзарадон-цардуагон бындур.
ПӔК-ы арæнгæрон службæ алы факты фæдыл дæр уагъта равзæрст.
Иумæйагæй, арæнсæтджытæ паддзахады къазнæмæ бафыстой ивартæ 248 мин сомы бæрц.
