ЦХИНВАЛ, 2 авг — Sputnik. Цæгат Ирыстоны сæргълæууæг Битарты Вячеслав радта республикæйы сгуыхт артистты нæмттæ Багаты Георгий, Харебаты Жан-Жак æмæ Наниты Виталийæн, фехъусын кодта Sputnik Хуссар Ирыстоны паддзахадон драмон театры аивадон къухдариуæггæнæг Дзуццаты Тамерлан.
"Нæ артистты нын рахицæн кодтой ахæм кадджын нæмттæй театралон аивады къабазы сæ лæггæдты тыххæй. Хорзæхтæ уыдон райстой Цæгат Ирыстоны культурæйы министры къухæй", — загъта аивадон къухдариуæггæнæг.
Йæ ныхæстæм гæсгæ, хуссарирыстойнаг труппæ арæх цæуы спектакльтимæ Дзæуджыхъæумæ, сценæмæкæсджытæ баззайынц тынг райгондæй.
"Фæстаг хатт гастролтимæ мах Дзæуджыхъæуы уыдыстæм майы. Уæд мах Цæгат Ирыстоны театры сценæйыл æвæрдтам спектакльтæ "Мещанин во дворянстве" æмæ "Фандо æмæ Лис". Спектакльтæ, кæй зæгъын æй хъæуы, цыдысты ирон æвзагыл æмæ тынг фæцыдысты сценæмæкæсджыты æмæ нæ коллегæты зæрдæмæ дæр", — загъта Дзуццаты Тамерлан.
Йæ ныхæстæм гæсгæ, æртæ артисты дæр театралон сценæйæн снывонд кодтой 30 азы бæрц куыст.
