ЦХИНВАЛ, 2 авг — Sputnik, Плиты Фатима. Цхинвалы дзулфыцæн комбинат йӕ ног заводы æрбакондмæ сцæттæ кæндзæн дунейы иууыл стырдæр уæлибыхтæ, фехъусын кодта Sputnik комбинаты директор Цхуырбаты Вадим.
Ритуалон хæбизджыны рекордон диаметр уыдзæн 120 см бæрц.
"Ацы мæйы хъуамæ скусын кæнæм дзулфыцæн комбинаты ног завод. Ацы цаумæ фæнд кæнæм скæнын рекордон уæлибыхтæ, кæцытӕн сӕ диаметр уыдзæн 118- 120 см", — загъта Цхуырбаты Вадим.
Официалон æгъдауæй Уæрæсейы рекордты чиныджы фыст æрцыд Цхинвалы дзулфыцæн комбинаты конд уæлибых 84 см диаметры бæрц, кæцы скодтой 2009 азы Республикæйы бонмæ. Уый фæстæ Дзæуджыхъæуы базарадон-экономикон техникумы скодтой стырдæр уæлибых (диаметр 105 см), фæлæ йæ рекордты чиныджы не сфидар кодтой.
