ЦХИНВАЛ, 17 авг — Sputnik. Культурӕйы министрады ӕмархайдӕй майрӕмбоны Цхинвалы бакӕндзысты ӕвзонг курдиатджын нывгӕнӕг Дыгъуызты Марияйы куыстыты равдыст "Лица и судьбы". Нывгӕнӕджы хъуыдымӕ гӕсгӕ, уӕлдай цымыдисон мадзал уыдзӕн фӕсивӕдӕн — уыдон равдысты портретты хсӕн ссардзысты сӕ кумирты цӕсгӕмттӕ.
Дыгъуызты Мария каст фӕцис Цхинвалы Тугъанты Махарбеджы номыл нывгӕнӕн ахуыргӕнӕндон ӕмӕ Краснодары культурӕ ӕмӕ аивӕдты университет.
"Лица и судьбы" у мӕ фыццаг персоналон равдыст. Экспозицийы уыдзӕн 33 портреты, алкӕмӕн дӕр дзы ис йӕхи хъысмӕт. Ныфс мӕ ис, уазджыты зӕрдӕмӕ мадзал фӕцӕудзӕн. Равдысты цӕсгӕмтты 'хсӕн фӕсивӕд ссардзысты сӕ кумирты — актертӕ ӕмӕ голливудаг артистты ", — загъта Дыгъуызты Мария.
Ӕвзонг курдиатджын нывгӕнӕг Дыгъуызты Марияйы равдыст "Лица и судьбы" ӕрбайгом кӕндзысты Анахарсисы номыл республикон библиотекӕйы цытджын уавӕры 18 августы 16:00 сахатыл.
