ЦХИНВАЛ, 17 авг — Sputnik. Хуссарирыстойнаг кадеттæ æмæ скъоладзаутæ сæ абхазаг æмбæйттимæ ахуыр кæнынц хæцæнгарзимæ архайын фæсивæдон æфсæддон-патриотикон æмбырд "Азбука безопасности и выживания-2017"-ы фæлгæтты, кæцы уагъд цæуы уæрæсейаг æфсæддон базæйыл Абхазы. Уый тыххæй хъусын кæны Хуссар æфсæддон зылды (ХӔЗ) пресс-службæ.
Баиугонды офицерты къухдариуæгады бын. Скъоладзаутæ ахуыр кæнынц пулеметæй, Калашниковы автоматæй, Макаровы пистолетæй, снайперон хæцæнгарзæй æхсын. Ӕхсынæй дарддæр ма сæ ахуыр кæнынц хæцæнгарз халын æмæ æмбырд кæнын.
"Ӕфсæддон медиктæ сывæллæтты базонгæ кæндзысты æфсæддон-медицинон цæттæдзинады нормативтимæ, равдисдзысты æмæ радзурдзысты æндæр æмæ æндæр уавæрты фыццаг медицинон æххуыс бакæныны принциптæ", — дзырдæуы хъусинаджы.
Мадзалы исынц хайад æрсидтагъоммæ кары фæсивæд Уæрæсе, Сомихстон, Абхаз æмæ Хуссар Ирыстонæй. Сбортæ уагъд цæуынц 15-29 августы Абхазы уæвæг 7-æм уæрæсейаг æфсæддон базæйыл.
Ӕфсæддон-патриотикон сборты сæйраг нысаниуæг у æнæниз, спортивон фæсивæды æмæ фыдыбæстæйы аккаг хъахъхъæнджыты хъомылад. Ам фæсивæд арвитдзысты дыууæ къуыри. Ахуыр кæндзысты æфсæддон топографи, æфсæддон медицинæ, рацæудзысты тренингты сæрмагонд комплекстæ. Улæфт бонты та цæудзысты экскурситы Абхазы фенддагдæр бынæттæм.
