ЦХИНВАЛ, 3 окт — Sputnik. Республикон паддзахадон унитарон куыстуат "Энергоресурс" сифтонг кæндзæн æрдзон газæй микрорайон "Хурзæрин" 20 октябрьмæ, фехъусын Sputnik кодта уагдоны директоры хæдивæг Гæбæраты Анатолий.
Нырмæ ацы районы цæрджытæ сæ хатæнтæ хъарм кодтой электронон хъармгæнæнты фæрцы, уый хыгъд уыдонæн сырæзт стыр хæстæ "Энергоресурс"-ы раз. Июлы мæйы цæржытæ бахатыдысты президент Бибылты Анатолиймæ, цæмæй сын сæ район сифтонг кæной æрдзон газæй. Уæд паддзахады сæргълæууæг баныфсæвæрдта микрорайон "Хурзæрин"-ы цæрджытæн, уазæлтты æрбалæуды онг сæ хъармгæнæн системæтæм уагъд кæй æрцæудзæн газ.
"Ныридæгæн æрдзон газ бауадзыныл цæуы куыст. Къахынц бынат хæтæлтæн. Бацархайдзыстæм, цæмæй фæззыгон уазæлттæм уырдæм фæхæццæ уа газ. Нæ фæндмæ гæсгæ, куыстытæ хъуамæ балхынцъ кæнæм 20 октябрьмæ", — загъта Гæбæраты Анатолий.
Микрорайон "Хурзæрин"-ы хæдзæртты фыццаг цæрджытæ æрцардысты 2010 азы.
