ЦХИНВАЛ, 4 окт — Sputnik, Уалыты Диана. Хуссар Ирыстоны хъахъхъæнынады министрад ауагъта равдыстон æфсæддон ахуыртæ, кæцыты рæстæджы алы дæлхайады службæгæнджытæ дæр равдыстой сæ физикон æмæ тактикон цæттæдзинад.
Маневртæ уагъд цыдысты полигон "Дзарцъем"-ы територрийыл. Дæлхайæдты æмархайд æмæ алыгъуызон уавæрты æфсæддон хæслæвæрдтæ æххæст кæныны æмвæзад базонынæн, афтæ ма хисæрмагонд сконды ахуыры цæттæдзинадæн аргълæвæрд скæнынæн уагъд æрцыдысты контролон ахуыртæ. Ахуырты рæстæджы ацыд тактикон-сæрмагонд ахуырты æлхынцъон этапы варианттæй иуы демонстраци.
Полигоны æххæст æрцыдысты цалдæр эпизоды æфсæддон техникæ æмæ алыгъуызон хæцæнгарзæй спайдагæнгæйæ. Полигоны цы цыд, уый æвдыст цыд стыр экраныл æмæ архæйдтытæн бынаты арæзтой комментаритæ офицертæ. Ӕфсæддон хæслæвæрдтæ куыд æххæст цæуынц, уымæ йæ хъус дардта Хуссар Ирыстоны президент Бибылты Анатолий æмæ хицауады уæнгтæ.
Ахуырты кæрон паддзахады сæргълæууæг загъта бузныг æфсæддонтæн иттæг хорз цæттæдзинады тыххæй.
"Куыст ацыд тынг бæрзонд æмвæзадыл, куыд оперативондзинадмæ гæсгæ, афтæ организацимæ гæсгæ дæр. Ӕз дæн бузныг дæлхайæдты командæгæнджытæй хисæрмагонд сконды цæттæдзинады тыххæй, афтæ ма хисæрмагонд скондн йæхицæй дæр, афтæ цæсгомджынæй кæй æххæст кæнынц сæ æфсæддон хæслæвæрдтæ", — загъта президент.
