ЦХИНВАЛ, 12 окт — Sputnik, Плиты Фатимæ. Хуссар Ирыстоны тыхджындæр æрыгон боксертæ – Кокойты Эдуард, Тыбылты Алик æмæ Джиоты Вадим стох кæндзысты æхсæнадон–паддзахадон спортивон баиугонд "Юность России"–йы, фехъусын кодта Sputnik спорты комитеты пресс-секретарь Софа Исаакян.
Лæппутæ сæхи сфæлвардзысты бæрзонд æмвæзады ерысты, кæцытæ боксертæн фадат дæттынц Уæрæсейы фыццагадмæ афтынæн.
"Хуссар Ирыстоны спортивон кад хъахъхъæндзысты æртæ лæппуйæ. Уыдонæй дыууæ — Кокойты Эдуард æмæ Тыбылты Алик сты боксы скъола "Олимп"-æй. Хуссар Ирыстоны номæй æртыккаг ерыстæм ацыд Джиоты Вадим, уый та у Хуссар Ирыстоны сывӕллӕтты ӕмӕ ӕрыгон фӕсивӕды боксы скъолайы хъомылгӕнинаг. Æртæ лæппу нырмæ дæр расгуыхтысты бирæнымæц ерысты", — загъта Софа Исаакян.
Кокойты Эдуард æмæ Тыбылты Аликы цæттæ кæнынц тренертæ Тедеты Алик æмæ Бестауты Чермен, Джиоты Вадимимæ кусынц тренертæ:Чехойты Алан, Кокойты Мурат, Плиты Азæмæт æмæ Куымæридтаты Родион.
Ерыстæ цæудзысты Курскы областы горæт Львовы 9-15 октябры.
