ЦХИНВАЛ, 23 окт — Sputnik, Козаты Диана. Хуссар Ирыстоны номыртимӕ хӕдтулгӕтӕн уӕрӕсейаг-хуссарирыстойнаг арӕныл баласт сфидар кӕнынимӕ ницы зындзинӕдтӕ ис, загъта Sputnik сӕйраг таможнӕйон комитеты сӕргълӕууӕг Цхуырбаты Мурӕт.
Ивгъуыд къуырийы соцхызæджыты фӕзынд информаци, Уæрæсеимæ арæныл уадзæн пункт "Дæллаг Зæрæмæджы" кæй бакодтой арæны сæртыл цæуыны ног уагæвæрд хуссарирыстойнаг номыртимæ машинæтæн. УФ таможнæйон службæйы минæвар Хуссар Ирыстоны Олег Рева майрӕмбоны фехъусын кодта Sputnik, уыцы дам-думтӕн ӕппындӕр кӕй ницы бындур ис.
"Ивгъуыд майрӕмбоны уагъд ӕрцыд фембӕлд нӕ цӕгатирыстойнаг коллегӕтимӕ, цы ран дзырд цыд ацы фарстыл дӕр. Хуссар Ирыстоны номыртимӕ хӕдтулгӕты хицӕуттӕн ницы зындзинӕдтӕ ис. Уыдон куыд истой баласт, афтӕ йӕ дарддӕр дӕр исдзысты таможнӕйон закондӕттынад ӕххӕстгӕнгӕйӕ", — загъта Цхуырбаты Мурӕт.
Раздӕр Хуссар Ирыстоны президенты пресс-секретарь Гасситы Дина фехъусын кодта, Бибылты Анатолий кӕй нымайы "æнæрцæугæ хъуыддагыл иуварсон уынаффæты райст, кæцытæ æндавынц Хуссар Ирыстоны цæрджыты 95 процентыл, кæцытæн ис уæрæсейаг æмбæстагад. Уыдон цæуынц дыууæ паддзахæдты æхсæн æмцæдисад æмæ æмгуыстады фæдыл бадзырды уагæвæрды ныхмæ".
