ЦХИНВАЛ, 24 окт — Sputnik. Президент Бибылты Анатолий дыццæджы бафыста барамынд Хуссар Ирыстоны ветеринарон æмæ фитосанитарон цæстдарды паддзахадон службæ – "Югоссельхознадзор" саразыны фæдыл, хъусын кæны паддзахады сæргълæууæджы пресс-службæ.
Документмæ гæсгæ, службæмæ баиу уыдзысты Хуссар Ирыстоны хъæууон хæдзарады министрады фæлгæтты архайгæ дæлхайæдтæ.
"Республикæ Хуссар Ирыстоны хъæууон хæдзарады министрады реорганизаци саразын – уырдыгæй ацух кæнын фитосанитарон æмæ ветеринарон цæстдарды фæдыл управлени, зайæгойтæ хъахъхъæнынады дæлхайад æмæ тауинæгты гъæды фæдыл дæлхайад æмæ сæ бакæнын Хуссар Ирыстоны хъæууон хæдзарадон цæстдарды службæ — "Югоссельхознадзор"-ы скондмæ", — дзырдæуы президенты указы.
Документмæ гæсгæ, Республикæ Хуссар Ирыстоны хицауад хъуамæ балхынцъ кæна æппæт реорганизацион мадзæлттæ 2017 азы 15 ноябрьмæ.
