ЦХИНВАЛ, 13 ноя — Sputnik. Хуссар Ирыстоны президент Бибылты Анатолийы официалон визит Уæрæсемæ райдыдта республикæйы сæргълæууæгыл цытджын фембæлдæй мæскуыйаг аэропорт "Внуково-2"-йы, хъусын кæны президенты пресс-службæ.
Президенты цытджын фембæлды рæстæджы схæцыдысты хуссарирыстойнаг æмæ уæрæсейаг паддзахадон тырысатыл, айзæлыдысты дыууæ бæстæты гимнтæ. Бибылты Анатолий æмæ йыл фембæлæг УФ ФХМ-ы 4-æм департаменты директор Алексей Павловский æрзылдысты Мæскуыйаг гарнизоны цытджын хъарагъулы рæнхъыл, "æгас цу" загътой Хуссар Ирыстоны делегацийы уæнгтæн, республикæйы минæварады кусджытæн Мæскуыйы æмæ уæрæсейаг фарсы минæвæрттæн.
Пресс-службæйы зонæнтæм гæсгæ, Хуссар Ирыстоны делегацийы сконды сты президенты администрацийы сæргълæууæг Козаты Игорь, фæсарæйнаг хъуыддæгты министр Медойты Дмитрий, æнæниздзинад хъахъхъæнынады министр Тотчиты Георгий, мидхъуыддæгты министр Наниты Игорь, финансты министр Хæбæлаты Аза æмæ æндæр официалон адæм.
Ӕртæбонон визиты фæлгæтты ацæудзысты Хуссар Ирыстоны президент Бибылты Анатолий æмæ Уæрæсейы президент Владимир Путины бадзырдтæ, уæрæх форматы фембæлд делегацийы уæнгтæ æмæ химæисгæ фарсы хайадистæй.
Фарсытæ æруынаффæ кæндзысты социалон æмæ экономикон фарстытыл, бафыст æрцæудзысты æхсæнхицауадон бадзырдтæ.
Бибылты Анатолий ма фембæлдзæн Науруйы президент Барон Дивавеси Вакаимæ æмæ УФ слестгæнæн комитеты сæргълæууæг Александр Бастрыкинимæ.
Официалон визит адарддæр уыдзæн 15 ноябры онг.
