ЦХИНВАЛ, 17 ноя — Sputnik. Хуссар Ирыстоны минæвар Бибылты Анатолий цыппæрæмы бабæрæг кодта драмон театры бæстыхайы арæзтадон куыстыты цыд. Аразджытимæ æмбырдыл куыстыты темп æмæ гъæдыл æруынаффæ кæнгæйæ, президент аскъуыддзаг кодта хи цæстæй фенын, куыд аразынц культурон объект.
Арæзтадон фирмæ "Эверест"-ы минæвар Руслан Фатыйхов радзырдта паддзахады сæргълæууæгæн, ныртæккæ куыст кæй цæуы театры змæлгæ сценæйыл. Уымæй дарддæр ма бантыст сæвæрын прожектор æмæ вентиляцийы системæ. Премьер-министр Пухаты Эрик æрлæууын кодта Фатыйховы зæрдыл Техцæстдарды фиппаинæгтæ, кæцытæ хъæуы рараст кæнын.
"Мах алцыдæр аразæм проектмæ гæсгæ, фæлæ уый нырма æлхынцъон вариант нæу. Ныма хъæуы ацы зонæйы хæрзарæзтадон куыстытæ ауадзын, хъæуы дзы нырма карнизтæ сæвæрын. Ӕмæ аиуварс кæндзыстæм техцæстдарды фиппаинæгтæ иууылдæр", — загъта арæзтадон компанийы минæвар.
Президент ма бахæс кодта аразджытæн 10 декабры онг æртæ горæттаг уынджы эксплуатацимæ раттын. Аразджытæ радтой хыгъд, асфальты фыццаг цъар ныридæгæн кæй æрцыд æвæрд.
"Герцены, Комаровы æмæ Сомихæгты уынгтыл ныридæгæн æвæрд æрцыдысты дæлзæхх коммуникацитæ иууылдæр, æвæрд æрцыд асфальты фыццаг цъар. Ныртæккæ хъæуы схæцын люктыл, цæмæй сæвæрæм æлхынцъон æмбæрзт", — бамбарын кодтой аразджытæ.
Рабадты рæстæджы ма дзырд цыд Цхинвалы бирæфатерон хæдзæртты арæзтадыл дæр. Нардуатисæг банысан кодта, объектыл кæй кусынц 86 адæймаджы. 60 фатеры бафæлвардзысты централон хъæрмады системæ, бирæ фатертæм уагъд æрцыд электрон рухс, цæуынц фасадон куыстытæ. Раздæры нардуатисæджы хъæндзинæдты тыххæй, ныртæккæ аразджытæ æмбæлынц уæлæмхас проблемæтимæ сæ куысты.
