ЦХИНВАЛ, 30 ноя — Sputnik, Козаты Диана. Хуссар Ирыстоны адæмон нывгæнæг Козаты Ушангы баныгæндзысты Дзæуджыхъæуы, Кады Аллейы, загъта Sputnik культурæйы министр Зассеты Жанна.
Ирыстоны зындгонддæр нывгæнæджы фæзианы уæззау хабар райхъуыст æртыццæджы. 11 ноябры Козаты Ушанг банысан кодта йæ 65-азон юбилей. Ивгъуыд къуырийы кæрон Цæгат Ирыстоны Тугъанты Махарбеджы номыл музейы байгом ис йæ юбилейон равдыст.
"Козаты Ушангы зиан бавæрдзысты майрæмбоны Дзæуджыхъæуы. Уымæн фæстаг "хæрзбон" зæгъынмæ Хуссар Ирыстонæй ацæудзæн стыр делегаци президент Бибылты Анатолийы сæргълæудæй", — загъта Зассеты Жанна.
Козаты Ушанг у Хуссар Ирыстоны адӕмон нывгӕнӕг, Уӕрӕсейы ӕмӕ Цӕгат Ирыстоны сгуыхт нывгӕнӕг, Уӕрӕсейаг аивӕдты академийы сгуыхт академик, Уӕрӕсейаг аивӕдты академийы уӕнг-корреспондент, Уацамонгæйы ордены кавалер.
