ЦХИНВАЛ, 11 дек — Sputnik, Козаты Диана. Хуссар Ирыстоны æфсæддон прокуратурæ уадзы слестгæнæн мадзæлттæ æфсæддон службæгæнæджы хи амарыны цауы уавæртæ рафæлгъауыны фæдыл, трагикон цау æрцыд горæт Къуайсайы, фехъусын кодтой Sputnik ведомствæйы пресс-службæйы.
Хуыгаты Алик йæхи фехста Калашниковы автоматæй сабаты æхсæвы йæхи хæдзары.
"Цау æвзары æфсæддон прокуратурæ, уагъд цæуынц слестгæнæн мадзæлттæ", — банысан кодтой пресс-службæйы.
Хъахъхъæнынады министрады радзырдтой, 40-аздзыд Хуыгаты Алик кæй куыста ведомствæйы дæлхайады Къуайсайы.
"Трагедийы размæ уый радта наряд, уый фæстæ ацыд хæдзармæ. Хуыгайы фырт фехста йæ сæр Калашниковы автоматæй. Къуайсайы рынчындонмæ 23:20 сахатыл фæдзырдта фæмардуæвæджы фыд", — загътой хъахъхъæнынады министрады.
Тагъд æххуысы кусджытæ æрбахæццæ сты 10 минутмæ, дохтыртæн бантыст Хуыгайы фырты къуайсайаг рынчындонмæ фæхæццæ кæнын, фæлæ уый амард Цхинвалмæ транспортировкæйы рæстæджы.
Ведомствæйы банысан кодтой, Хуыгаты Алик йæхи цы хæцæнгарзæй фехста, уый кæй нæ уыд дæлхайады табелон хæцæнгарз.
