ЦХИНВАЛ, 21 дек — Sputnik, Козаты Диана. Хуссар Ирыстоны ивгъуыд аз регистрацигонд æрцыд 190 фыдракæнды, уыдонæй 150 æрцыдысты райхæлд, загъта пресс-конференцийы рæстæджы Цхинвалы МХМ-ы криминалон милицийы сæргълæууæг Цхуырбаты Андрей.
Йæ ныхæстæм гæсгæ, фыдракæндты нымæц кæны къаддæр æмæ, фароны азимæ абаргæйæ, фыдракæндты райхæлды нымæцы процент та чысыл фæфылдæр. 2016 азы ацы цифрæтæ уыдысты — 231, уыдонæй 179 æрцыдысты райхæлд.
"Ацы аз нын бантыст фыдракæндты нымæц 33 иуæджы бæрц фæкъаддæр кæнын. Сæ райхæлд та фæфылдæр 1,5 проценты бæрц", — загъта Цхуырбаты Андрей.
Михъуыддæгты министры хæдивæг Кокойты Тарзан зæрдыл æрлæууын кодта, ацы аз нæ республикæйы цы резонансон фыдракæндтæ арæзт æрцыдысты, уыдон.
"Уыдон арæзта иу къорд, сæ сæргълæууæг у ахст, йæ æмархайджыты йын агурæм. Уый æрцахстимæ мах раргом кодтам ноджы дæс ахæм фыдракæнды", — загъта Кокойты Тарзан.
Криминалон милицийы сæргълæууæджы ныхæстæм гæсгæ, ацы цаутæ æрбангом кодтой МХМ-ы кусджыты, уый фæрцы та барадхъаъхъæнæг органты куыст бæрæг фæхуыздæр.