ЦХИНВАЛ, 19 фев — Sputnik, Козаты Диана. Хуссар Ирыстоны столицæ Цхинвалы балхынцъ сты Сочийаг цирчы артистты ралæудтæ. Акробаттæ, жонглертæ, уæлдæфон гимнасттæ, эквилисбристтæ æмæ ахуыр цæрæгойтæ æртæ боны дæргъы арæзтой æцæг бæрæгбон Хуссар Ирыстоны сабитæн. Алы сеанс дæр иу æрæмбырд кодта йедзаг зал.
Сывæллæттæ цингæйæ кастысты, сценæйыл куыд ралидз-балидз кæнынц чысыл ахуыр куыйтæ, диссаджы рæсугъд мæргътæ, куыд архайынц жонглертæ, дисæфтыдæй кастысты дикобраз æмæ леопардмæ, тарстысты стыр бур калмæй.
Уæлдай цин сывæллæттæ кодтой удыгас крокодилыл, кæцы дрессировкæгæнæг рахаста залыл.
"Арæхдæр иу куы аразиккой ахæм бæрæгбæттæ. Мах райстам стыр æхцондзинад. Бакастыстæм дыууæ сеансмæ", — загъта дыууæ сывæллоны мад Анна.
Алы сеанс дæр цыд сахатæй чысыл фылдæр, уый фæстæ иу сывæллæттæн уыд фадат схизын сценæмæ æмæ зæрдылдарынæн сисын къам цæрæгойтимæ æмæ стыр бур роботимæ.
