ЦХИНВАЛ, 19 фев — Sputnik. Нальчикы ацыд гом турнир эстетикон гимнастикæйæ, цы ран хайад райста хуссарирыстойнаг командæ "Ир-Олимп Валерия", фехъусын кодта эстетикон æмæ аивадон гимнастикæйы федерацийы президент Цхуырбаты Зема.
Ралæудты фæстиуджытæм гæсгæ, 8-10 азы кары хуссарирыстойнаг спортсменкæтæ схызтысты пьедесталы дыккаг къæпхæнмæ къорд "А"-йы. Ӕрыгон гимнасткæты тренер у Саулохты Наталья, хореограф та – Зассеты Элина.
Амæй размæ хуссарирыстойнаг гимнасткæтæ рамбылдтой цыппар сыгъзæрин майданы аивадон гимнастикæйæ æрвылазон гом фыццагад "Горянка"-йы, кæцы ацыд 2017 азы декабры. Эстетикон гимнастикæ республикæйы архайы æрмæстдæр цыппæрæм аз, хъусын кæнынц федерацийы.
