ЦХИНВАЛ, 19 мар — Sputnik, Плиты Фатимæ. Хуссар Ирыстоны Культурæйы министрад курдиатджын адæм æмæ фæсивæды хсæн уадзы фæндырдзæгъдджыты конкурс "Фæндыры зæлтæ", фехъусын кодтой Sputnik министрады пресс-службæйы.
"Адæмон инструменттыл цæгъдын популяризацийы æмæ курдиатджын фæсивæды рабæрæг кæныны нысанæн цæуы конкурс "Фæндыры зæлтæ". Уымæй дарддæр ма сбæлвырд кæндзысты фидæны æхсæнадæмон конкурстæм хайадистмæ æрвитыны аккаг музыканттæ", — загъта уагдоны пресс-секретарь Остъаты Мæдинæ.
Конкурсы уагæвæрдмæ гæсгæ, музыкалон композицитæ сæххæст кæнæн ис баян, аккордеон æмæ ирон фæндырыл. Фыццаг этапы тобæгон у фонограммæйæ пайда кæнын.
"Организатортæ сæ разы цы хæстæ æвæрынц, уыдонæй сæйраг у адæмон сфæлдыстады пропагандæ. Сæ арæхстдзинад цæгъдыны хъуыддаджы сæ бон у равдисын цыфæнды кары адæмæн дæр Хуссар Ирыстоны æмæ УФ æмбæстæгтæй", — бафтыдта Мæдинæ.
Сфæлдыстадон конкурс ацæудзæн 20 марты Ӕлборты Феликсы номыл музыкалон ахуыргæнæндоны бæстыхайы.
