ЦХИНВАЛ, 23 мар — Sputnik. Дзæуджыхъæуы уагъд цæуы скъолаагъоммæ уагдæтты хъомылгæнинæгты æхсæн цæгатирыстойнаг конкурс "Иры фидæн"-ы муниципалон этап, хъусын кæны горæты бынæттон хиуынаффæйады администрацийы пресс-службæ.
Ӕрвылазон мадзал Цæгат Ирыстоны столицæйы уагъд цæуы ныр дыууынæм хатт. Хайад дзы исынц Дзæуджыхъæуы сабидæттæ иууылдæр. Сывæллæттæ ерыс кæнынц ирон æвзаг зонынады, актерон дæсниады æмæ нывкæнынады. Жюрийы скондмæ бацыдысты ирон æвзаджы ахуыргæнджытæ, сабидæтты къухдариуæггæнджытæ æмæ столицæйы ахуырады управленийы минæвæрттæ.
Конкурсы сæйраг нысан у сывæллæтты хиирхæфсæн хуызы цайдагъ кæнын мадæлон æвзагыл.
Алы скъолаагъоммæ ахуырадон уагдоны дæр бакондæуыд 3 æнæмæнг сахаты ирон æвзаг ахуыр кæнынæн хъазты хуызы. Конкурс "Иры фидæн" у программæйы мадзæлттæй иу.
