ЦХИНВАЛ, 11 апр — Sputnik, Козаты Диана. Хуссар Иры Мидхъуыддæгты министрады (МХМ) кусджытæ æрцахстой дыццæджы Дзауы районы Хъорсеуы хъæуы цæрæджы наркотиктæ уæй кæныны тыххæй.
Уæйгæнæджы бантыст уыцы бон æрцахсын Цхинвалы цæрæджы амындæй, кæцымæ оперативон кусджытæ ссардтой æртæ граммы гæн.
"Оперативон информацийы реализацийы рæстæджы, МХМ-ы кусджытæ æрлæууын кодтой автомашинæ 40-аздыд шофыримæ рулыл. Шофыры басгæрсты рæстæджы йæ уæлæдарæсы дзыппы ссардæуыд спичкæйы къопп 2,92 грамм гæнимæ", — радзырдтой МХМ-ы пресс-службæйы.
Азымгондыл æвæрд æрцыд бæрн наркотикон буарадты æнæзаконон зилдухы тыххæй.
Ӕрфарсты рæстæджы уый радзырдта, наркотикон буарад уый кæй балхæдта, Хъорсеуы хъæуы 60-аздзыд цæрæгмæ.
Фæстæдæр, МХМ-ы кусджытæ цхинвайлаг автовокзалы æрцахстой уыцы хъæуккаджы, йæ хæдзары цур агъуысты та ссардтой æмбæхст гæн.
МХМ-ы экспертон-криминалистон хайад бафидар кодта, ацы буарад кæй у "гæн, йæ иумæйаг уæз у 613 грамм. Ӕнæ тауинæгтæй та йæ уæз уыд 591 грамм.
Ӕмбæстаджы аххосджын кæнынц наркотиктæ уæй кæныны хъуыддаджы.
