ЦХИНВАЛ, 20 апр — Sputnik, Плиты Фатимæ. Хуссар Ирыстоны паддзахадон ансамбль "Симд"-ы сæйраг балетмейстерæй нысан æрцыд Уæрæсейы сгуыхт артист, Цæгат Ирыстон æмæ Цæцæн-Мæхъæлы сгуыхт артист, ансамбль "Алан"-ы легендарон солист Булацаты Таймураз. Уый тыххæй Sputnik фехъусын кодта коллективы аивадон къухдариуæггæнæг Гаглойты Ростик.
Булацаты Таймураз кусы коллективимæ12 мартæй фæстæмæ, уый æрхуыдтой, цæмæй бацæттæ кæна ансамблы кафджытимæ "Фыййæуты кафт".
"Таймуразы фыццаг фæхуыдтам иу кафт æвæрынмæ. Йæ куыстæй баззадыстæм райгонд, коллектив дæр æй райста хорз. Сразы йæ кодтам ансамблы балетмейстерæй æрлæууыныл. Уый радон концертмæ, кæцы ацæудзæн майы, бацæттæ кæндзæн ног кафт", — загъта Гаглойты Ростик.
Булацаты Григорийы фырт Таймураз бирæ æзты дæргъы кафыд ансамбль "Алан"-ы сконды. Дзæуджыхъæуы кусы ансамбль "Скиф"-ы аивадон къухдариуæггæнæгæй, æмрæстæджы архайы "Алан"-ы ветеранты дæр иу къорды æрæмбырд кæныныл.
