ЦХИНВАЛ, 3 май — Sputnik. Хуссар Ирыстоны Ленингоры районы, хъӕу Дӕллаг Болы йӕ хӕдзары кӕрты амардтой 90-аздзыд сылгоймаджы, хъусын кӕны Мидхъуыддӕгты министрады (МХМ) пресс-службӕ.
Уагдонмӕ ӕрбацыд информаци, зӕгъгӕ, йӕ хӕдзары кӕрты ссардтой сылгоймаджы фыдмарды нысӕнттимӕ. Фыдракӕнды бынатмӕ уайтагъд ацыдысты мидхъуыддӕгты районон управленийы оперативон къорд, афтӕ ма Генералон ӕмӕ Ленингоры прокуратурӕты фӕдагурджытӕ.
"Оперативон-сгарӕн мадзӕлтты фӕстиуӕгӕн барадхъахъхъӕнӕг органты кусджытӕ сбӕлвырд кодтой ӕмӕ ӕрцахстой зӕрдӕхсайгӕ адӕймаджы, кӕцы разындис Дӕллаг Болы 22-аздзыд цӕрӕг", — радзырдта министрады минӕвар.
Лӕппу басастис йӕ фыдракӕндыл, цауы фӕдыл басгӕрст уадзынц Ленингоры районы МХМ ӕмӕ прокуратурӕ.
