ЦХИНВАЛ, 21 июн — Sputnik, Уалыты Диана. Уӕлыстол теннисӕй XV Ӕппӕтуӕрӕсӕйон турниры хайад райсдзӕн хуссарирыстойнаг командӕ тренер Джиоты Мирианы сӕргълӕудӕй, хъусын кӕны фӕсивӕдон политикӕ, спорт ӕмӕ туризмы комитет.
"Хуссарирыстойнаг командӕйы сконды ис ӕхсӕз спортсмены — Бекъойты Эдвард, Джиголаты Аланӕ, Козаты Милена, Плиты Аланӕ, Гӕбӕраты Эдуард ӕмӕ Джиоты Георгий", — фехъусын кодта комитет йӕ официалон фарсыл Facebook.
Турнир, кӕцы нывонд у наркотикон буарадты ныхмӕ тохы ӕхсӕнадӕмон бонӕн, уагъд цӕудзӕн 21-24 июны Нальчикы. Ерысты хайад исдзысты ӕртӕ кары къорды спортсментӕ.
Уӕлыстол теннисӕй Ӕппӕтуӕрӕсейон турнирмӕ ӕрвылаз дӕр ӕрымбырд вӕййынц хуыздӕр спортсментӕ Кӕсӕг-Балхъарӕй, Цӕгат Ирыстонӕй, Краснодар ӕмӕ Ставрополы крайтӕй, афтӕ ма Уӕрӕсейы ӕндӕр регионтӕй.
