ЦХИНВАЛ, 28 июн — Sputnik. Хуссар Ирыстоны Паддзахадон автоинспекцийы кусджытӕ радзырдтой велосипедисттӕн фӕндагон змӕлды фӕткты тыххӕй, хъусын кӕны республикӕйы Мидхъуыддӕгты министрады (МХМ) пресс-службӕ.
Инспектортӕ бамбарын кодтой ӕвзонг велосипедисттӕн, фистӕгон ахизӕны раз кӕй хъуамӕ ӕрфистӕг уой ӕмӕ сӕ транспорт къухӕй ракӕной. Афтӕ ма, Паддзахадон автоинспекцийы кусджытӕ банысан кодтой, велосипедисттӕ кӕй хъуамӕ пайда кӕной хъахъхъӕнӕн фӕрӕзтӕй.
Автоинспекцийы батальоны командир Коцты Алим ӕрсидт ныййарджытӕм, цӕмӕй сывӕллӕтты ӕнӕхъусдардӕй ма уадзой.
"Ныййарджытӕ хӕсдзысты бӕрн, чысыл велосипесттӕ фӕндагон змӕлды фӕтк куы халой, уӕд", — загътой автоинспектортӕ.
Ацы азы райдайӕнӕй республикӕйы фӕндӕгтыл ӕрцыд иу ФТЦ, цы ран хайад иста велосипедист. Цӕфтӕ баййӕфта астаздзыд чызг, кӕцы скъӕрдта велосипедыл цӕуынӕн бӕзгӕ фӕндагыл.
