ЦХИНВАЛ, 26 июл — Sputnik, Плиты Фатимæ. Уæрæсейы иууыл æгъатырдæр террорист Шамиль Басаевы аиуварс кæныны фæдыл операцийыл таурæгъгæнæг фильм "Решение о ликвидации" равдисдзысты Цхинвалы 4 августы. Равдыстмæ æнхъæлмæ кæсынц кинонывы сæйраг фæлгонцтæ цы артисттæ сæххæст кодтой, уыдон æрцыдмæ, фехъусын кодтой Sputnik культурæйы министрады пресс-службæйы.
Уæрæсейы иууыл æгъатырдæр террорист Шамиль Басаевы аиуварс кæныны фæдыл операцийыл таурæгъгæнæг фильм "Решение о ликвидации" 7 июны рацыд уæрæх прокаты.
"Киноныв Цхинвалы Киноконцертон зал "Чермен"-ы равдисдзысты 4 августы, 18:00. Фильмы презентацимæ Хуссар Иры æнхъæлмæ кæсныц кинонывы режиссер Александр Аравин æмæ актер Игорь Петренкойы æрцыдмæ, кæцы фильмы сæххæст кодта сæйраг æвæрццаг фæлгонц", — загъта уагдоны пресс-секретарь Остъаты Мадинæ.
Киноныв "Решение о ликвидации" ист æрцыд Цæгат Ирыстоны. Сæйраг рольтæй иу сæххæст кодта Хуссар æмæ Цæгат Ирыстоны сгуыхт артист, РХИ паддзахадон театры иууыл ирддæр актертæй иу — Пæррæстаты Дмитрий. Уый у йæ дебютон куыст кинойы, куыд сæйраг фæлгонцтæй иуы æххæстгæнæг, афтæ. Уымæй размæ ма Дмитрий ахъазыд сериалтæ "Солдаты" æмæ "Тайная стража"-йы.
Ирон актер Пæррæстаты Дмитрий кинонывы ахъазыд Уæрæсейы иууыл æгъатырдæр террорист Шамиль Басаевы æмгары роль. Уымæй дарддæр ма дзы архайынц æндæр ирон актертæ, се ʻхсæн цæгатирыстойнаг Фидарты Сослан.
Фильмы æвдыст цæуынц 2006 азы цаутæ, Шамиль Басаев æмæ йæ æмархайджытæ куынæг куы рцыдысты. Сценарий вæрд æрцыд раргомгонд факттыл. Сæйраг террористы ролы архайы цæцæйнаг актер Аюб Цингиев. Сæйраг фæлгонцты ма ахъазыдысты Игорь Петренко, Алексей Вертков.
