ЦХИНВАЛ, 16 авг — Sputnik, Плиты Фатимæ. Хуссар Ирыстоны Дзауы скъола-интернат æмæ районы Сывæллæтты сфæлдыстадон галуан капиталон цалцæджы фæстæ райсдзысты ахуырдзауты, фехъусын кодтой Sputnik районы пресс-службæйы.
Сывæллæтты сфæлдыстадон галуан ног бæстыхайы мидæг кусдзæн Музыкалон скъола æмæ библиотекæ, нырмæ уыдон архайдтой вагæтты. Дзауы скъола-интернат бахъыгдард æрцыд 2014 азы зынгирвæзты.
"Ног ахуыры азы райдайæнмæ æрбакæндзысты ног цалцæггонд Дзауы скъола-интернат. Куыстытæ тагъд темпытæй цæуынц Сывæллæтты сфæлдыстадон галуаны дæр. Уый арæзтадмæ бавнæлдтой ивгъуыд аз, фæлæ фæстæдæр куыстытæ æрурæдтой раст экспертиза йын кæй нæ уыд, уый аххосæй. Ныридæгæн æппæт цæлхдуртæ иуварс æрцыдысты æмæ уый дæр æрбакæндзысты сентябры", — загъта пресс-секретарь Тедеты Лиана.
Уымæй дарддæр ма, Дзауы районы æппæт скъолатæ фæндзæм сентябрьмæ æрæцæудзысты цалцæг.
2018 азы æппæт ахуырадон уагдæттæ сæ куыст райдайдзысты 5-æм сентябрæй — ахуыры азы райдайæн фæфæстæдæр кодтой Беслæны 2004 азы æрцæугæ трагедийы тыххæй.
