ЦХИНВАЛ, 20 авг — Sputnik. Хуссар Ирыстоны дарддӕр цӕуы диспансеризаци цӕрджытӕн ӕмӕ хуыцаубоны Федералон медико-биологон агентады (ФМБА) медицинон къорд райдыдта республикӕйы административон районты цӕрджыты медицинон басгӕрст. Уый тыххӕй хъусын кӕны ӕнӕниздзинад хъахъхъӕнынад ӕмӕ социалон райрӕзты министрады пресс-службӕ.
19-21 августы басгардзысты Знауыры районы цӕрджыты — нывӕндынц фенын 1400 адӕймаджы.
"Бынӕттон цӕрджыты ӕнӕниздзинад басгардзысты нарӕг профилы специалисттӕ — терапевт, невролог, кардиолог, хирург, гинеколог, офтальмолог, оториноларинголог, уролог, эндокринолог. Цӕрджытӕ рацӕудзысты лабораторон иртасӕн, флюорографи, маммографи, ЭКГ", — банысан кодта Хуссар Ирыстоны диспансеризаци сорганизаци кӕныны кусӕгон къорды разамонӕг Цъӕриттаты Инна.
Афтӕ ма уый банысан кодта, зӕгъгӕ, районы администраци рахицӕн кодта ӕртӕ автобусы цӕрӕг пункттӕм цӕуынмӕ ӕмӕ пациентты хъӕутӕй централон районон рынчындонмӕ ласыны тыххӕй.
