ЦХИНВАЛ, 21 авг — Sputnik, Плиты Фатимæ. Хуссар Ирыстоны хæдбардзинад Уæрæсейы æрдыгæй банымадыл дæс азы сæххæсты цытæн Цхинвалы ацæудзæн æхсæнадæмон турнир Ӕмхæццæ æмтохæдтæй "К-9", фехъусын кодта Sputnik Фæсивæдон политикæ, спорт æмæ туризмы комитеты сæрдар Зассеты Сергей.
Ӕмхæццæ æмтохæдты турнир "К-9" аразы Хуссар Иры Фæсивæдон политикæ, спорт æмæ туризмы комитеты æмæ Уæрæсейы тыхон структурæты цæттæгæнæн федераци "К-9".
"Тохты архайдзысты Уæрæсейы "К-9"-ы федерацийы профессионалон лигæйы спортсментæ æмæ Хуссар Ирыстоны тыхон структурæты минæвæрттæ дыууæйæ. Аст тох ацæудзæн турниры фæлгæтты, фарастæм фембæлды архайджытæ та тох кæндзысты Хуссар Иры президенты Кубокыл", — загъта Зассеты Сергей.
Уый ма радзырдта, Уæрæсейы "К-9" федерацийæн ис стыр фæлтæрддзинад ахæм турниры ауадзыны хъуыддаджы, "уыдон фæаразынц Беслæны теракты амæттæгты номарæн турниртæ".
Уæрæсейы тыхон структурæты цæттæгæнæн федераци "К-9"-ы уæнгтæ фыццаг хатт Хуссар Ирмæ æрцыдысты 2006 азы зонгæкæнæн балцы. Ацы аз сеʻ рцыды рæстæджы уыдон фембæлдысты президент Бибылты Анатолимæ дæр.
Мадзал арæзт цæуы Хуссар Ир æмæ УФ-йы ʻхсæн ахастытæ фенгом кæныны нысанæн æмæ тыхон структурæты имидж фæбæрзонддæр кæныны нысанæн. Фембæлдтæ цæудзысты 2 раундтæй, фæйнæ 5 минуты. Титулон фембæлдтæ та цæудзысты 3 раундтæй, алкæцы дæр фæйнæ 5 минут.
Ерыстæ цæудзысты Цхинвалы спорты галуан "Олимп"-ы, 26 августы.
