ЦХИНВАЛ, 19 сен — Sputnik. Хуссар Ирыстоны президент Бибылты Анатолий радта инӕлар-майоры ном Ӕддагон разӕсгарӕн службӕйы (ӔРС) сӕргълӕууӕг Уарзиаты Алексейӕн, хъусын кӕны паддзахады сӕргълӕууӕджы пресс-службӕ.
"Республикӕйы къухдариуӕгад ӕмӕ адӕмы уырны Дӕ патриотизм ӕмӕ хорз ахаст службӕмӕ. Инӕлар-майоры ном у хорзӕх Дӕ ӕрвылбоны куысты тыххӕй", — бахахх кодта президент.
Афтӕ ма Бибылты Анатолий схорзӕхджын кодта Уарзиаты Алексейы майданӕй "Хуссар Ирыстоны Фыдыбӕстон хӕсты адӕмы уӕлахизыл 10 азы сӕххӕсты цытӕн".
ӔРС сӕргълӕууӕг банысан кодта уагдоны кусджыты цӕттӕдзинад республикӕйы суверенитет хъахъхъӕныниӕ.
"Мах ӕмбарӕм нӕ бӕрн Хуссар Ирыстоны ӕдасдзинады тыххӕй ӕмӕ цӕттӕ стӕм хъахъхъӕнын йӕ националон суверенитет. Ӕмӕ Дӕ хъусдарды руаджы нӕ уагдонмӕ, Ӕддагон разӕсгарӕн службӕйы оперативон-службӕйон архайды фӕзынд хорз динамикӕ", — банысан кодта Уарзиаты Алексей.
