ЦХИНВАЛ, 26 сен — Sputnik. ХПӔ бӕстӕты, Хуссар Ирыстон ӕмӕ Абхазимӕ социалон-экономикон ӕмгуыстады хайады хистӕры хӕдивӕг Денис Травин Хуссар Ирыстонмӕ кусӕгон балцы рӕстӕджы федта объекттӕ, кӕцытӕ арӕзт цӕуынц Хуссар Ирыстоны 2018-2019 ӕзты Инвестпрограммӕйы фӕлгӕтты. Уӕрӕсейаг чиновникимӕ уыд республикӕйы хицауады сӕрдар Пухаты Эрик, хъусын кӕны хицауады пресс-службӕ.
Денис Травин ӕмӕ Пухаты Эрик бацыдысты ацӕргӕ адӕмы медико-социалон центрмӕ Цхинвалы цӕгат-скӕсӕны кӕроны, цӕрӕн комплекстӕм Хъайтарты ӕмӕ Гуыбаты ӕфсымӕрты уынгтыл, столицӕйы центры уазӕгдон ӕмӕ горӕты уынгтӕм.
Арӕзтад, архитектурӕ ӕмӕ ЦКХ министры хӕстӕ ӕххӕстгӕнӕг Зӕгъойты Эдуард радзырдта, медико-социалон центры арӕзтад кӕронмӕ кӕй бахӕццӕ — объект ратдзысты эксплуатацимӕ октябры кӕрӕтты.
Ацӕргӕ адӕмы раздӕры хӕдзар нал бӕззы дарддӕр пайда кӕнынӕн, банысан кодта ӕнӕниздзинад хъахъхъӕнынады министр Тотчиты Георгий.
"Ирыстон" уазӕгдонмӕ бацыды рӕстӕджы Травин банысан кодта, зӕгъгӕ, Цхинвалы центр ныридӕгӕн у тынг рӕсугъд. Уый банысан кодта, йӕ зӕрдӕ кӕй райы объектты арӕзтадӕй ӕмӕ загъта бузныг хицауады сӕрдарӕн куыстытӕ рӕстӕгыл саразыны тыххӕй.
"Мӕ радон ӕрцыдмӕ сымах фестут медико-социалон центрмӕ фӕндаджы арӕзтад. Ахсджиаг у, алкӕцы ног объект дӕр кӕй бахӕссы хайбавӕрд республикӕйы райрӕзтмӕ", — загъта Денис Травин.
