ЦХИНВАЛ, 18 окт — Sputnik, Плиты Фатимæ. Ӕхсæнадæмон V фестиваль-конкурс "Ирон бæгæны 2018"-ы æвзарæн туры уæлахиздзау Гаглойты Андзелина цыппæрæмы тæрхонгæнджыты размæ рахæсдзæн дзауаг хæрзад бæгæны, фехъусын кодта Sputnik районы культурæйы хайады гæс Кæркуысты Галина.
Хуссар Ирыстоны Республикæ расидыны бæрæгбоны рæстæджы Цхинвалы равзæрстой хуыздæр бæгæныфыцæджы – уæд иууыл хуыздæр нозты саразæг æфсин разынд дзауаг Гаглойты Андзелина, уый дарддæр архайы фестивалы.
Конкурс "Ирон бæгæны 2018"-ы финал цæуы цыппæрæмы Дзæуджыхъæуы Ирон театры фæзуатыл.
"Ирон бæгæныйæ дарддæр ма равдисдзыстæм район цæмæй хъæзныг у, уыдæттæ. Нæ сæрмагонд фынгыл уыдзæн ирон къæбицы хæринæгтæ – задын, дзыкка, мыд æмæ халсар. Хуссарирыстойнаг бæгæныфыцæг никуы ма рамыблдта конкурс, æрмæст ма иу хатт æртыккаг бынатмæ схызтыстæм, фæлæ мах хуызæн хæрзад бæгæны никуы аразынц", — радзырдта Кæркуысты Галина.
Хуыздæр бæгæныфыцæгмæ æнхъæлмæ кæсы æхцайы приз – 80 мин сомы. "Хæрзад" тохы бацыдысты "Ирон бæгæны 2018"-ы æвзарæн турты уæлахиздзаутæ Цæгат æмæ Хуссар Ирыстонæй, афтæ ма Бельги, Франц, Турк æмæ Уæрæсейы ирон диаспорæтæй.
