ЦХИНВАЛ, 9 ноя — Sputnik, Гӕбӕраты Ян. Хуссар Ирыстоны ацы аз сбӕрӕг кодтой 120 фӕндагон-транспортон цауы (ФТЦ), фарон аз та уыцы бӕрӕггӕнӕн уыд 136. Фӕлӕ мӕлӕтдзаг фӕстиуджытимӕ ФТЦ-ты нымӕц фӕфылдӕр ис ацы аз, радзырдта Sputnik брифингы рӕстӕджы республикӕйы Мидхъуыддӕгты министрады (МХМ) Паддзахадон автоинспекцийы (ПАИ) хистӕр Джиоты Алан.
"ФТЦ-ты нымӕц фӕкъаддӕр, фӕлӕ фылдӕр кӕнынц мӕлӕтдзаг цаутӕ. Ацы аз авариты амӕттаг баисты 12 адӕймаджы", — загъта Джиоты Алан.
Йӕ ныхӕстӕм гӕсгӕ, фӕндӕгтыл бирӕ хӕдтулгӕтӕ кӕй фӕзынд, уый тыххӕй шофырты чысыл рӕдыд дӕр расайы авари. Уымӕн ӕвдисӕн у фӕндагон змӕлды фӕткхалдты статистикӕ — 2018 азы фараст мӕймӕ сбӕрӕг кодтой фӕндагон змӕлды фараст мин фӕткхалды.
"Республикӕйы ис 20 мин хӕдтулгӕйӕ фылдӕр: куыд фылдӕр транспортон фӕрӕзтӕ ис, афтӕ авариты нымӕц дӕр фылдӕр кӕны. Ӕз хъуыды кӕнын, ӕмӕ фӕндагон змӕлды хайадисджытӕ хъуамӕ дарой хорз ахаст кӕрӕдзимӕ. Афтӕ куы уа, уӕд ФТЦ-ты статистикӕ дӕр фӕивдзӕн хуыздӕрырдӕм", — банысан кодта Джиоты Алан.
