ЦХИНВАЛ, 10 дек – Sputnik, Козаты Диана. Хуссар Ирыстоны 2018 азы ӕрцыд 24 зынгсирвӕзты, уыцы цауты иу адӕймаг дӕр нӕ фӕмард, загъта Цхинвалы пресс-конференцийыл Уӕлвӕткон уавӕрты министрады (УУМ) сӕргълӕууӕг Тадтаты Алан.
Къуырисӕры министр хатдзӕгтӕ сарӕзта уагдоны куыстӕн ивгъуыд азы. Уый ӕрхаста цаутӕ ӕмӕ ӕндӕр мадзӕлтты статистикӕ, кӕцыты архайдтой УУМ ирвӕзынгӕнджытӕ.
"Ацы аз республикӕйы ӕрцыд 24 зынгсирвӕзты, фарон уыдон нымӕц уыд 23. Фӕнды мӕ банысан кӕнын, зынгсирвӕзты рӕстӕджы амӕттӕгтӕ кӕй нӕй. Дыууӕ адӕймаджы фӕмард сты зынгсирвӕзты фӕстиуӕгӕн рынчындоны", — загъта Тадтаты Алан.
Йӕ ныхӕстӕм гӕсгӕ, ивгъуыд азы УУМ сӕрмагонд техникӕ рацыд цауты бынӕттӕм 1709 хатты, фарон та — 2192 хатты. Министр банысан кодта, зӕгъгӕ, техникӕ-иу ацыд зынгсирвӕзттӕ аиуварс кӕнынмӕ, афтӕ ма уӕззау уавӕрты бахауӕг адӕмӕн техникон ӕххуысы тыххӕй.
Тадтаты Алан бахахх кодта, ацы аз кӕй ацыдысты ахуырадон эвакуацитӕ республикӕйы скъолатӕ ӕмӕ сабидӕтты, УУМ кусджытимӕ уым хайад райстой ахуыргӕнджытӕ.
"Саперон къордтӕ ссардтой ӕмӕ скуынӕг кодтой 792 рӕмудзӕн ӕрмӕджы, уыдонӕй 300 ссардтой Уӕрӕсейы УУМ ирвӕзынгӕнӕн центр "Лидер"-ы сапертӕ. Афтӕ ма скуынӕг кодтой 4 мин нӕмыгӕй фылдӕр", — радзырдта УУМ сӕргълӕууӕг.
Афтӕ ма уый радзырдта, УФ УУМ ахуыргӕнӕндӕтты кӕй ахуыр кӕнынц Хуссар Ирыстоны УУМ 14 кусӕджы, республикӕйы скъолаты 10 рауагъдоны та ныридӕгӕн фесты ахуыр ахуыргӕндӕтты ӕмӕ сын радтой куысты бынӕттӕ.
Министр бафтыдта, зӕгъгӕ, нывӕнды фембӕлын Уӕрӕсейы УУМ сӕргълӕууӕг Евгений Зиничевимӕ, цы ран ӕрдзурдзысты санитарон авиаци ӕмӕ паддзахадон материалон фӕсауӕрцы тыххӕй уӕлвӕткон уавӕрты рӕстӕджы.
