ЦХИНВАЛ, 17 янв – Sputnik, Козаты Диана. Хуссар Ирыстоны уæлвæткон уавæрты министр Тадтаты Алан цыппæрæмы бабæрæг кодта Траскавказаг автомагистралы уавæр.
Хуссар Ир æмæ Уæрæсейы хсæн иунæг фæндаг æхгæд у ныр æртыккаг бон. Транскамыл нæ лæууы йæ уарынæй мит, уымæ гæсгæ фæндагон службæты бон нæу сыгъдæггæнæн куыстытæм бавналын.
"Цæгаттаг фарс тынг уары мит. Ахæм боныгъæды фæндагон æмæ зæйты ныхмæ службæтæн нæй гæнæн кусын. Райсомæй дзы фæхъарм ис, æмæ уый расайдта цалдæр зæйы. Кусджытæ баныфс æвæрдтой, зæгъгæ, куыддæр боныгъæд фæхуыздæр уа, афтæ æрæвналдзысты трассæ сыгъдæг кæнынмæ", - хъусын кæны пресс-службæ министры ныхæстæ.
Тадтаты Аланы ныхæстæм гæсгæ, цыппæрæмы фæндаг зынтæй бакæна - трассæйыл миты бæрзæнд хæццæ кæны 1,5 метрмæ.
"Цæгат Иры УУМ бæрæггæнæнтæм гæсгæ, митуард куы фæлæууа, уæддæр ма бахъæудзæн иу суткæйы бæрц, цæмæй фæндаг расыгъдæг кæной æмæ йæ бакæной. Махæн фыццаджыдæр у бæлццæтты æдасдзинад", - загъта УУМ сæргълæууæг.
Синоптикты бæрæггæнæнтæм гæсгæ, митуард фæлæудзæн цыппæрæмы изæрмæ, æмæ кæд нал уара, уæд майрæмбоны Транскам чизоны бакæна.
