ЦХИНВАЛ, 18 янв – Sputnik, Козаты Диана. Цæгат Ирыстоны фæндагон службæтæ æрмæст дæр сабаты изæрмæ расыгъдæг кæндзысты Транскавказаг автомагистраль мит æмæ зæйтæй, загътой РХИ Уæлвæткон уавæрты министрады (УУМ) пресс-службæйы.
Трассæ сæхгæдтой дыццæджы изæрæй стыр митуард æмæ зæйты æрцыды тыххæй. Цалдæр бонмæ фæндагмæ рацыд дæсæй фылдæр зæйы, боныгъæд нæ уагъта специалистты сыгъдæггæнæг куыстытæм æрæвналын. УУМ информацимæ гæсгæ, мит йæ уарынæй фæлæууыд æрмæст дысон изæр.
"Цæгат Иры фæндагон æмæ зæйты ныхмæ службæтæ æрæвнæлдтой Транскам сыгъдæг кæнынмæ. Нырма уал хъæуы зæйты хсæн уынгæг фæндаг ахафын, стæй та зæйтæ фехсын æмæ фæдаг ссыгъдæг кæнын", - банысан кодтой пресс-службæйы.
Хуссар Иры УУМ ма бафтыдтой, сæрмагонд службæты раз кæй ис тынг стыр куыст - прогнозмæ гæсгæ, фæндаг расыгъдæг кæндзысты æрмæст дæр сабаты изæрмæ.
