ЦХИНВАЛ, 7 фев — Sputnik, Плиты Фатимæ. Хуссар Ирыстоны сабитæн æртæ боны дæргъы Сочийы цирк ауадздзæн равдысттæ. Циркы шоу-программæмæ æнæаргъæй сæ бон бакæсын уыдзæн Ленингоры сывæллæтты хæдзары хъомылгæнинæгтæн, фехъусын кодта Sputnik Культурæйы министрады аивады хайады хистæр Ӕлборты Фатимæ.
Цирк равдысттæ дæтдзæн ПККЗ "Чермен"-ы 11,12 æмæ 13 февралы.
"Ӕвæрццагæй ма дзы уый ис æмæ уыдон Ленингоры сывæллæтты хæдзары хъомылгæнинæгты иууылдæр, æдæппæтæй 23 сабийы, æрхондзысты æнæаргъæй. Сабиты столицæмæ æркæныны фарст алыг кæндзæн районы хистæры хæстæ æххæстгæнæг Гулиты Владимир", - загъта министрады минæвар.
Циркы уыдзæн ахуыр цæрæгойтæ – куыйтæ, маймулитæ, стай, енот æмæ æндæртæ. Равдысттæ уыдзысты бон цыппар хатты. Программæ хæссы 1,5 сахаты. Билеты аргъ у 350-400 сомы.
