ЦХИНВАЛ, 4 мар — Sputnik, Плиты Фатимӕ. Галаты Борисы номыл Хуссар Ирыстоны кафт æмæ зарды паддзахадон ансамбль "Симд"-ы оркестры къухдариуӕггӕнӕг, республикӕйы сгуыхт артист Ходты Эльбрусы Уӕрӕсейы схайджын кодтой Кавказы хуыздӕр гармонисты номӕй, фехъусын кодта Sputnik "Симд"-ы сæйраг администратор Гаглойты Кристина.
Дунейон ӕмӕ Уӕрӕсейаг артистон комитет ЮНЕСКО-имӕ иумӕ, афтӕ ма Уӕрӕсейы Ахуырад ӕмӕ Культурӕйы министрадтӕ, Уӕрӕсейы адӕмты ассамблеи, Гнесины номыл Уӕрӕсейы музыкӕйы академи, Ӕхсӕнадӕмон сфӕлдыстады академи уадзынц фыццаг хорзӕхкӕныны церемони Кавказы хуыздӕр гармонистты хсӕн "Зӕрин дæсæг".
"Хуссар Ирыстоны музыкант ацы хорзӕх "Зӕрин дæсæг"-ӕй саккаг кӕндзысты Уӕрӕсейы. Хуынды гӕххӕт ӕрцыд ансамблы разамонӕг Гаглойты Ростикы номыл. Республикӕйы сгуыхт артист Ходты Эльбрус ацыд хорзӕхкӕныны цытджын церемонимӕ. Йемӕ ма бамбал сты ансамбль "Симд"-ы солисттӕ –Хуссар Ирыстон ӕмӕ Хъӕрӕсе-Черкесы сгуыхт артистка Хуыгаты Олеся ӕмӕ Хуссар Иры сгуыхт артист Санахъоты Инал. Сфӕлдыстадон къорд сӕххӕст кӕндзӕн ӕнӕцудгӕ кафт", - загъта Гаглойты Кристина.
Дунейон артистон комитеты сконды сты Армени, Беларусь, Болгари, Бразили, Ватикан, Венгри, Вьетнам, Герман, Греци ӕмӕ ӕндӕр бӕстӕтӕ.
