ЦХИНВАЛ, 27 мар - Sputnik. Хуссар Ирыстоны Мидхъуыддӕгты министрады (МХМ) автопарк баххӕст кодтой 42 ног хӕдтулгӕйӕ. Уагдоны сӕргълӕууӕг Наниты Игорь радта хӕдтулгӕты дӕгъӕлтӕ йӕ кусджытӕн дыццӕджы, хъусын кӕны МХМ пресс-службӕ.
МХМ кусджытӕ райстой хӕдтулгӕтӕ "Лада Гранта", ВАЗ -21214, ВАЗ–21310 ӕмӕ УАЗ–390995.
"Абон МХМ дӕлхайадтӕ райстой ног автотранспорт сӕ оперативон куыст фӕхуыздӕр кӕнынӕн. Хӕдтулгӕтӕ бацӕудзысты районтӕ ӕмӕ горӕты миддхъуыддӕгты хайадтӕм, афтӕ ма Паддзахадон автоинспекци ӕмӕ криминалон милицийы автопаркмӕ", - загъта мидхъуыддӕгты министр.
![Хуссар Иры МХМ райста дӕсгай хӕдтулгӕтӕ Хуссар Иры МХМ райста дӕсгай хӕдтулгӕтӕ - Sputnik Хуссар Ирыстон](https://cdnn1.img.sputnik-ossetia.ru/img/833/25/8332599_0:0:1028:643_600x0_80_0_0_4f802874acf15bc1525c3c710a429265.jpg)
Наниты Игорь банысан кодта, автотранспорт кӕй балхӕдтой ацы азы райдайӕны Уӕрӕсе ӕмӕ Хуссар Ирыстоны ӕхсӕн бадзырды фӕлгӕтты.
Афтӕ ма МХМ сӕргълӕууӕг фехъусын кодта, уагдонӕн стыр ӕххуыс кӕй кӕны президент Бибылты Анатолий ӕмӕ республикӕйы хицауад.
Наниты Игорь бафтыдта, зӕгъгӕ, ацы ӕххуыс фыццаг нӕ уыд бӕстӕйы къухдариуӕгадӕй. МХМ автопарк ныридӕгӕн дыууӕ хатт сцалцӕг кодтой фарон, фӕфылдӕр сты мыздтӕ, радтой ӕхцайы фӕрӕзтӕ амӕттаг кусджыты бинонтӕн. Уагдоны сӕргълӕууӕг банысан кодта, ацы ӕххуысы руаджы сын кӕй ис хорз фӕстиуджытӕ.