ЦХИНВАЛ, 4 апр — Sputnik. Хуссар Ирыстоны ӕмбӕстӕгты номхыгъды, кӕцытӕн хъӕуы фӕхуыздӕр кӕнын сӕ цӕрӕнуатон уавӕртӕ, ис 2,5 мин адӕймаджы, хъусын кӕны республикӕйы хицауады пресс-службӕ.
Хицауад сфидар кодта 2020-2022 ӕзты концепци, цӕмӕй сифтонг кӕной ӕмбӕстӕгты хицӕн категориты цӕрӕнуатӕй.
"Ӕмбӕстӕгтӕн фӕхуыздӕр кӕнын сӕ цӕрӕнуатон уавӕртӕ у иууыл ахсджиагдӕр паддзахадон хӕслӕвӕрдтӕй иу. Республикӕйы къухдариуӕгад йӕхи фӕрӕзтӕй ӕххуыс кӕны ӕмбӕстӕгтӕн аскъуыддзаг кӕнын цӕрӕнуаты проблемӕ, фӕлӕ уӕддӕр бахъӕудзӕн Уӕрӕсейы финансон ӕххуыс", - хъусын кӕны Пухаты Эрикы ныхӕстӕ хицауады пресс-службӕ.
Хуссар Ирыстоны райрӕзты программӕты реализацийы фӕлгӕтты Уӕрӕсейы финансон ӕххуысы руаджы сарӕзтӕуыд цӕрӕнуаты 95 мин квадратон метр.
2019 азы кӕрӕттӕм нывӕндынц фӕуын дыууӕ 75-фатерон хӕдзары арӕзтад столицӕйы ӕмӕ дыууӕ 18-фатерон хӕдзары арӕзтад та республикӕйы районты.
Пухаты Эрик банысан кодта, Хуссар Ирыстоны цӕрӕнуаты арӕзтады фарстытыл ӕрдзурдзысты 2020-2022 ӕзты Инвестпрограммӕмӕ ӕркасты рӕстӕджы Хуссар Ирыстон ӕмӕ Уӕрӕсейы Ӕхсӕнхицауадон къамисы рабадтыл.
