ЦХИНВАЛ, 16 апр — Sputnik, Плиты Фатимӕ. Хуссар Иры паддзахадон драмон театр Цӕгат Ирыстоны уырыссаг театримӕ иумӕ студенттӕ ӕмӕ хистӕркъласонты ʻхсӕн сиды конкурс спектакль "Хъӕд"-ыл хуыздӕр рецензи ныффыссыны фӕдыл, фехъусын кодтой Sputnik ПДТ пресс-службӕйы.
Александр Островскийы пьесӕ "Хъӕд"-мӕ гӕсгӕ спектакльтӕ Цхинвалы ӕвдыст цӕудзысты дыууӕ боны дӕргъы – 18 ӕмӕ 19 апрелы. Цыппӕрӕмы цхинвайлӕгтӕ фендзысты уацмыс хуссарирыстойнаг труппӕйы ӕххӕстӕй, йӕ фӕстӕ бон та йӕ бавдисдзӕн Цӕгат Иры уырыссаг театры труппӕ.
"Луганскмӕ фестивальмӕ аласыны размӕ спектакль "Хъӕд" равдисдзыстӕм нӕхи сценӕйыл, 18 апрелы. Афтӕ рауад ӕмӕ йӕ фӕстӕ бон та Цхинвалмӕ рцӕудзӕн РЦИ Уырыссаг театр гастрольты, уыдон дӕр сӕ ралӕудтӕ райдайдзысты Островскийы "Хъӕд"-ӕй. Афтӕмӕй сценӕмӕкӕсӕгӕн фадат уыдзӕн уырыссаг классикон уацмысы дыууӕ труппӕйы бавдыстӕй фенын ӕмӕ сын саргъ кӕнын", - загътой пресс-службӕйы.
Уагдон сиды студенттӕ ӕмӕ скъоладзаутӕм бакӕсын спектакльтӕм ӕмӕ сӕ тыхтӕ бафӕлварын рецензи ныффыссыны хъуыддаджы.
"Фӕсивӕдӕй кӕй фӕнды бакӕсын ӕмӕ саргъ кӕнын ацы куыстытӕн ӕмӕ стӕй уый фӕдыл сӕ хъуыдытӕ ныффыссын, уыдонмӕ сидӕм сфӕлдыстадон конкурсмӕ, сочиненитӕ ист цӕудзысты 25 апрельмӕ. Мӕйы кӕрон ӕртӕ хуыздӕр куысты автортӕ райсдзысты ӕхцайы премитӕ, сӕ куыстытӕ та мыхуыр ӕрцӕудзысты республикӕйы раздзæуæг информацион агентадтӕ Sputnik ӕмӕ "Рес"-ы", - бафтыдтой уагдоны.
Островскийы уацмысмӕ гӕсгӕ спектакль хуссарирыстойнаг театры сценӕйыл сӕвӕрдта уӕрӕсейаг режиссер Андрей Цисарук 2017 азы.
Цӕгат Ирыстоны Вахтанговы номыл уырыссаг академон театры труппӕ Островскийы "Хъӕд" сӕвӕрдта болгариаг режиссер Богдан Петканинимӕ.
