ЦХИНВАЛ, 28 май – Sputnik. Уӕрӕсейаг арӕнхъахъхъӕнджытӕ Хуссар Ирыстоны дыццӕджы нысан кӕнынц Уӕрӕсейы арӕнгӕрон органты сӕвзӕрдыл 101 азы сӕххӕсты бӕрӕгбон, хъусын кӕны Уӕрӕсейы Арӕнгӕрон службӕйы пресс-службӕ.
Уӕрӕсейы нырыккон арӕнхъахъхъӕнӕн органты истори райдыдта 1918 азы 28 майы, Адӕмон къамисартӕ Декрет куы бафыстой Уӕрӕсейы советон федеративон республикӕйы Арӕнгӕрон службӕйы сӕвзӕрды фӕдыл, уый фӕстӕ.
"100 азы дӕргъы арӕн хъахъхъӕнджытӕ ӕрвылбон хъахъхъӕнынц паддзахадон арӕнтӕ. Абон, Республикӕ Хуссар Ирыстоны паддзахадон арӕн ПӔК Арӕнгӕрон службӕимӕ иумӕ уӕрӕсейаг арӕнгӕрон службӕйы кусджытӕ куы хъахъхъӕнынц, уӕд Хуссар Ирыстоны цӕрджытӕн сӕ бон фынӕй кӕнын у ӕдасӕй", - дзырдӕуы хайады хъусинаджы.
Ацы датӕйӕ дарддӕр ма Хуссар Ирыстоны 2019 азы нысан кӕнынц республикӕйы территорийыл уӕрӕсейаг Арӕнгӕрон службӕйы архайдыл 10 азы сӕххӕст, банысан кодта йӕ арфӕйы президент Бибылты Анатолий, кӕцыйы ныхӕстӕ хъусын кӕны паддзахады сӕргълӕууӕджы пресс-службӕ.
"Хуссар Ирыстон ӕмӕ Уӕрӕсейы арӕнхъахъхъӕнджыты пайдаджын ӕмгуыстад дӕтты ныфс, сӕ службӕйон хӕслӕвӕрдтӕ ӕххӕст кӕй цӕудзысты цӕсгомджынӕй", - дзырдӕуы арфӕйы телы.
Бибылты Анатолий равдыста ныфс, уӕрӕсейаг арӕнхъахъхъӕнджытӕ дарддӕр дӕр бӕрнон службӕ кӕй хӕсдзысты, цӕмӕй сабырдзинад уа Хуссар Ирыстоны зӕххыл.
