ЦХИНВАЛ, 7 авг — Sputnik. Хуссар Ирыстоны ахуырады министр Гасситы Натали радзырдта РИА Новости сывӕллӕтты уавӕры тыххӕй, кӕцытӕ бавзӕрстой хӕсты цаутӕ 2008 азы августы.
Гасситы Наталийы ныхӕстӕм гӕсгӕ, ӕрмӕстдӕр фӕстаг дыууӕ-ӕртӕ азы сывӕллӕттӕ райдыдтой дзӕбӕх кӕнын фӕсхӕстон синдромӕй.
"Кӕй зӕгъын ӕй хъӕуы, психологон травмӕ сывӕллӕттӕн баззад. Хистӕр фӕлтӕр уӕддӕр фӕразынц хӕст, сывӕллӕттӕ та нӕйы", - радзырдта Гасситы Натали.
Министр бахахх кодта, хӕсты фӕстӕ Хуссар Ирыстоны сывӕллӕттимӕ куыстой психологтӕ. Ныртӕккӕ дӕр алкӕцы скъолайы ис психолог.
"Мах ӕрвылаз уадзӕм сывӕллӕтты нывты конкурс. Саразӕм сын анализ. 2008 азы фӕстӕ сывӕллӕттӕ сӕ нывты фылдӕр ӕвдисынц танктӕ, хӕцӕнгӕрзтӕ. Ныр та уавӕр фӕхуыздӕр ис", - радзырдта министр.
Гуырдзыстон 2008 азы 8 августы ӕхста Хуссар Ирыстон "Град"-ӕй, Гуырдзыйы ӕфсӕдтӕ ӕрбабырстой республикӕмӕ. Уӕрӕсе, Хуссар Ирыстоны цӕрджыты хъахъхъӕнгӕйӕ, кӕцыты стыр хай райста УФ ӕмбӕстӕггад, бакодта йе 'фсӕдты республикӕмӕ ӕмӕ фондзбонон хӕсты фӕстӕ фӕтардта Гуырдзыстоны ӕфсӕдты. Мӕскуы 2008 азы 26 августы банымадта Хуссар Ирыстон ӕмӕ Абхазы хӕдбардзинад.
