ЦХИНВАЛ, 25 окт - Sputnik, Дриаты Лейла. Хуссар Иры столицæйы хуссар-скæсæн кæрон амад фесты дыууæ бирæуæладзыгон хæдзары, ног мæйы фатертæ æрфысым кæндзысты сæ бардарджыты, фехъусын кодта Sputnik арæзтады къухдариуæггæнæг Коцты Эдуард.
Гуыбаты æфсымæрты уынгыл хæдзæрттæ арæзт æрцыдысты социалон-экономикон райрæзты инвестицион нывæзты фæлгæтты, æдæппæт сæ ис 150 фатеры. Уыдонæй 50 æртæхатæнонтæ, иннæтæ та сты дыууæхатæнон æмæ иухатæнон фатертæ.
"Дыууæ бирæуæладзыгон хæдзар дæр сты цæттæ. Уырдæм ноябры кæрон балидздзысты, фатертæ лæвæрд кæмæн æрцæудзысты, уыцы æмбæстæгтæ. Канд фатертæ нæ, фæлæ ныридæгæн цæттæ у хæдзæртты фасад дæр", - зæгъы Коцты Эдуард.
Уый ма загъта, зæгъгæ, ЦАРЗ-ы микрорайоны ноджы арæзт æрцæудзæн рæвдауæндон дæр 160 сабийæн. Уый арæзтадмæ та бавналдзысты 2020 азы. Фидæны та ЦАРЗ-ы районы сырæздзæнис иу бирæуæладзыгон хæдзар.
Гуыбаты æфсымæрты уынгыл цы 75 цæрæн фатеры арæзт æрцыд, уыдон дзуапп дæттынц хæрзвадат нормæтæн. Аразгæ та йæ скодта арæзтадон организаци "СТМ-Юг". Йæ бакæнгæ куыстытæм нæ вæййы фау æрхæссæн. Фатертæ дæр арæзт æрцыдысты иууыл хуыздæр планировкæйыл. Хæдзæртты кæртты сæвæрдтой асфальт, сывæллæттæн дзы сарæзтой хъазæн фæзуат. Кæрты ис фæхсбандæттæ æмæ мини стидион дæр.
Банысан хъæуы уый æмæ ацы бирæуæладзыгон хæдзары арæзтад раздæр нысан кæй цыдис нæ горæты Гаглойты Владимиры уынджы. Фæлæ республикæйы разамынады инициативæйæ уый рахастæуыд ацы бынатмæ, цæмæй рæза æмæ рæсугъддæр кæна ЦАРЗ-ы микрорайон дæр.
